Keke ve kerzıki ra sonê cemedi sero kay kenê.
Keke samotina ra, gınena waro, lınga ho şikina.

Keke vana : “Cemed, cemed, tı senê cemeda ke to sero lınga mı şikiye?”
Cemed vano : “Ez ke cemed nêbiyêne, tiji mı nêeştêne.”

Keke vana : “Tiji, tiji, tı senê tijia ke erzena cemedi?”
Tiji vana : “Ez ke tiji nêbiyêne, mı gılê kou nêeştêne.”

Keke vana : Koêne, koêne, sıma senê koê ke tiji erzena gılê sıma?”
Koy vanê : “Ma ke koy nêbiyêne, mal ma ra nêçerdêne.”

Keke vana : “Malo, malo, tı senê mala ke kou ra çerena?”
Mal vano : “Ez ke mal nêbiyêne, vergi mı dıme nêverdêne.”

Keke vana : “Vergo, vergo, tı senê verga ke verdena mali dıme?”
Verg vano : “Ez ke verg nêbiyêne, kutıki mı dıme nêverdêne.”

Keke vana : “Kutık, kutık, tı senê kutıka ke verdena vergi dıme?”
Kutık vano : “Ez ke kutık nêbiyêne, hardê dewrêşi sero lap mı ver nêkerdêne.”

Keke vana : “Hardo dewrês, hardo dewrês, tı senê hardo dewrêsa ke to sero lap kenê kutıki ver?”
Hardo dewrês vano : “Ez ke hardo dewrês nêbiyêne, merre ez qule nêkerdêne.

Keke vana : “Merre, merre, tı senê merrewa ke hardê dewrêşi qule kena?”
Merre vano : “Ez ke merre nêbiyêne, pısınge mı dıme nêverdêne.
Keke vana : “Pısıngi, pısıngi, tı senê pısınga ke verdena merrey dıme?”
A, pısınge 'xulp' ho pençere ro erzena ...

Vatene : Pılemoriye

Arêker : Mirzali Zazaoğlu