Halo ke tederime, riyê ma dezneno
Ax u zarê derdu, muyê saru rısneno
Zerri u pısıkê , ma zerre de pozneno
Xağunê ma weno, ostu ki vılosneno

Najni, dedeçêneyi, vêyv u derezayi
Xalê ma, xalcêni, xaliki u werezayi
Piriki, khaliki, lac, çêna, pi u mayi
Bêpêr u bêqom u bêqebilu verdayi

Baqıl u hozonayi, ma ra nêverdayi
Senatkar u destberi ki pêro remnayi
Qav, qecağu kerre gurete, weriyayi
Balisnêyi, orğan u dosegi heleşiyayi

Pirık u khalıkê ho ki, ma caverdayi
Mezal nêda, ke bıroşime mal u gayi
Çêverê gozınê nexsnaye vırajiyayi
Sari berdi, lozıngun ho de wêsnayi

Verê ho çarna, koyi tê dıma dêmdayi
Hem malê yavani, thêyr u thurê uzayi
Bırr u gemi, dewi, wareyi caverdayi
Pêro tê dıme ra osan osan unciyayi

Zulumkaru çê u warê ma ki vêsnayi
Merek u gor u axurê ma pêro rıznayi
Dest u duji, gem u bırri, merg u hêgayi
Mezelê kalıkuné ma, bêwayir verdayi

Nıka çınay rê bıver vi, kamêjiye vaji
Ez, Heqê na dina ra çıturi benu raji
Cokura zowtu kenu zerrê her mesaji
Vılê ho era rast nê vo, yê xêrnewaji

Torné Thuji